Innskráning með SSO: Microsoft Entra ID

Hverjir geta gert þetta: stjórnandi eða eigandi fyrirtækjaaðgangs á Plan 1–3 eða Enterprise. Lestu fyrst Innskráning með SSO og reglur um innskráningu til að fá yfirlit.

Starfsfólkið skráir sig inn í Parasend með Microsoft-vinnuaðgangi sínum. Með notendastýringu (SCIM) bætir Entra ID fólki líka við í Parasend, gerir það óvirkt og fjarlægir það, og getur ráðið hlutverki þess út frá hópi. Uppsetningin tekur um 20 mínútur.

Þú þarft að vera stjórnandi í Parasend, á Plan 1–3 eða Enterprise. Í Entra þarftu hlutverkið Cloud Application Administrator eða Application Administrator.

Áður en þú byrjar

  • Staðfestu lénið í Parasend undir Teymi → Lén. Aðeins er hægt að kveikja á SSO þegar lén hefur verið staðfest. Þegar starfsfólk skráir sig inn með SSO og slær inn vinnunetfangið segir lénið Parasend hvert á að senda það.
  • Opnaðu uppsetninguna í Parasend undir Innskráning og SSO → Setja upp og veldu Microsoft Entra ID. Þar eru slóðirnar sem þú límir inn í Entra, hver með afritunarhnappi. Hafðu hana opna við hlið leiðbeininganna.
  • Slóðirnar eru á API-þjóni Parasend, og í þeim er eigin lykill reikningsins, {org_key} (26 bókstafir og tölustafir). Uppsetningin sýnir þær nákvæmlega, með lykli reikningsins. Þær eru á þessu formi:
    • Identifier (Entity ID): https://api.parasend.com/saml/{org_key} (líka slóð SAML-lýsigagna Parasend);
    • Reply URL (Assertion Consumer Service URL): https://api.parasend.com/saml/{org_key}/acs;
    • Sign on URL: https://api.parasend.com/saml/{org_key}/start.

1. Búðu til forritið í Entra

  1. Í Microsoft Entra admin center skaltu fara í Enterprise applications → New application → Create your own application.
  2. Gefðu því nafn, til dæmis „Parasend“, og veldu Integrate any other application you don't find in the gallery.
  3. Undir Properties skaltu stilla Assignment required? á Yes. Þá geta aðeins þau sem þú úthlutar forritinu skráð sig inn.
  4. Undir Users and groups skaltu úthluta forritinu þeim sem eiga að nota Parasend. Til að úthluta hópum þarf Entra ID P1 eða P2.

2. Stilltu SAML

  1. Farðu í Single sign-on → SAML og breyttu Basic SAML Configuration.
  2. Límdu inn úr uppsetningunni í Parasend:
    • Identifier (Entity ID);
    • Reply URL (Assertion Consumer Service URL);
    • Sign on URL. Þetta er upphafsslóð Parasend. Með henni hefst innskráningin í Parasend þegar smellt er á Parasend í My Apps.
  3. Láttu Attributes & Claims eiga sig. Entra sendir alltaf objectidentifier og tenantid og Parasend tengir hvern og einn með þeim. Netfangið er aldrei notað til að tengja neinn; nafn og netfang eru aðeins sýnd.
  4. Undir SAML Certificates skaltu afrita App Federation Metadata Url.
  5. Í uppsetningunni í Parasend skaltu líma hana inn í skrefi 3 og velja Skrá veitu.

3. Prófaðu og kveiktu svo

  1. Í Parasend skaltu velja Prófa með eigin aðgangi. Þú skráir þig inn hjá Microsoft og kemur aftur í Parasend. Forritinu þarf að hafa verið úthlutað þér sjálfum.
  2. Parasend sýnir hvern Entra skráði inn. Ef það ert þú skaltu velja Já, þetta er ég. Þá er þessi Microsoft-aðgangur tengdur rafrænum skilríkjum þínum.
  3. Veldu Kveikja og staðfestu með rafrænum skilríkjum.

Eftir það velur starfsfólk Notaðu Microsoft, Okta, Google eða SAML? á innskráningarsíðu Parasend og slær inn vinnunetfangið, eða opnar Parasend úr My Apps. Í fyrsta sinn staðfestir hver og einn sig einu sinni með rafrænum skilríkjum. Eftir það dugar Microsoft-aðgangurinn.

4. Krefjast SSO (valkvætt)

  • Hvað það gerir: þegar SSO er krafist komast meðlimir aðeins inn í aðganginn ykkar í Parasend í gegnum Entra. Sá sem þú gerir óvirkan í Entra kemst þá ekki lengur inn.
  • Ef Entra bregst: eigandinn og allt að tveir stjórnendur sem þú nefnir geta samt skráð sig inn með rafrænum skilríkjum.
  • Áður en þú kveikir á því: Parasend nefnir þá meðlimi sem hafa aldrei skráð sig inn í gegnum Entra. Gakktu úr skugga um að Entra hafi þá.
  • API-lyklar virka áfram.

Til að kveikja á því skaltu skrá þig inn með SSO, velja Krefjast SSO og staðfesta með rafrænum skilríkjum.

5. Notendastýring (SCIM)

Með notendastýringu berst breyting í Entra til Parasend án þess að beðið sé eftir næstu innskráningu viðkomandi. Entra bætir fólki við þegar þú úthlutar því forritinu og gerir það óvirkt þegar þú tekur úthlutunina af eða gerir það óvirkt í Entra.

  1. Í Parasend, undir Notendastýring (SCIM), skaltu velja Búa til lykil og staðfesta með rafrænum skilríkjum. Afritaðu lykilinn: hann er aðeins sýndur einu sinni.
  2. Í Entra skaltu opna Provisioning forritsins, stilla Provisioning Mode á Automatic og líma inn undir Admin Credentials:
    • Tenant URL: SCIM-slóðina úr Parasend, https://api.parasend.com/scim/v2;
    • Secret Token: lykilinn.
  3. Veldu Test Connection og svo Save.
  4. Undir Mappings → Provision Microsoft Entra ID Users skaltu breyta vörpun externalId. Stilltu upprunaeigindið á objectId (sjálfgefið hjá Entra er mailNickname). Parasend parar þann sem notendastýringin sendir við innskráningu hans með þessu gildi; með öðru gildi mætast þau aldrei.
  5. Undir Settings skaltu hafa Scope áfram Sync only assigned users and groups. Stilltu Provisioning Status á On og vistaðu.

Entra keyrir notendastýringu á um 40 mínútna fresti. Fyrir breytingu sem má ekki bíða, til dæmis þegar einhver hættir, skaltu velja Provision on demand fyrir viðkomandi.

Hvað hver breyting í Entra gerir í Parasend:

  • Úthlutað: viðkomandi birtist undir Úthlutað en ekki skráð inn á síðunni Teymi. Hann bætist í teymið við fyrstu innskráningu með SSO.
  • Úthlutun tekin af, gerður óvirkur eða eytt: meðlimurinn verður óvirkur og er skráður út um leið. Hann tekur ekkert sæti og SSO-tenging hans fellur niður, svo ef hann kemur aftur staðfestir hann sig aftur með rafrænum skilríkjum. Eigandinn fær tölvupóst með þeim virku API-lyklum sem viðkomandi hafði, til að skipta um þá.
  • Úthlutað aftur eða gerður virkur aftur: meðlimurinn verður virkur á ný, ef laust sæti er í áskriftinni.
  • Eytt endanlega (eftir 30 daga hjá Entra): meðlimurinn er fjarlægður úr teyminu og API-lyklar hans færast til eigandans.
  • Aldrei eytt: sendingum, sönnunargögnum og atburðaskrá.
  • Aldrei gerður óvirkur eða fjarlægður af notendastýringu: eigandinn.

6. Hlutverk úr hópum

Til þess þarf Entra ID P1 eða P2, af því að hópum er úthlutað forritinu.

  1. Í Entra skaltu búa til hóp fyrir hvert hlutverk sem þú vilt veita, nefndan eftir því: Parasend Admins, Parasend Developers, Parasend Senders, Parasend Viewers eða Parasend Billing. Nafn hlutverksins eitt og sér gengur líka.
  2. Úthlutaðu þessum hópum forritinu undir Users and groups.
  3. Hafðu áfram kveikt á Mappings → Provision Microsoft Entra ID Groups.

Svona virka hlutverkin:

  • Einn hópur: hver meðlimur fær hlutverk hópsins síns um leið.
  • Fleiri en einn hópur: viðkomandi fær hæsta hlutverkið, í röðinni Stjórnandi (Admin), Forritari (Developer), Sendandi (Sender), Greiðslur (Billing), Lesaðgangur (Viewer). Parasend sýnir viðvörun.
  • Enginn hópur: viðkomandi fær hlutverkið sem stillt er undir Án hóps í Parasend.
  • Að breyta hlutverki: hlutverki sem kemur úr hópi er ekki hægt að breyta í Parasend. Breyttu hópnum í Entra.
  • Hlutverk eigandans breytist aldrei.

Parasend hefur aðeins þessa fimm hópa. Ef þú úthlutar forritinu líka öðrum hópum til að veita aðgang, til dæmis „Allt starfsfólk“, skráir Entra villu fyrir hvern þeirra í hverri keyrslu. Til að forðast það skaltu setja síu á vörpun hópanna (Source Object Scope: displayName byrjar á „Parasend“), svo aðeins hlutverkahóparnir séu sendir.

Skilríki (certificates)

  • Gildistími: SAML-undirritunarskilríki Entra gilda sjálfgefið í þrjú ár.
  • Áminningar: Entra sendir tölvupóst á tilkynningarnetfangið sitt 60, 30 og 7 dögum áður en skilríkin renna út. Parasend sendir eiganda og stjórnendum tölvupóst 30, 14 og 7 dögum áður.
  • Til að skipta um þau: undir SAML Certificates skaltu búa til ný skilríki og gera þau virk. Ekkert þarf að gera í Parasend. Parasend les slóð lýsigagnanna daglega, og strax þegar ný skilríki undirrita innskráningu.

Ef eitthvað fer úrskeiðis

  • Entra sýnir villu áður en þú kemur aftur í Parasend:
    • AADSTS50105: forritinu hefur ekki verið úthlutað þér.
    • AADSTS50011: Reply URL passar ekki.
  • Parasend segir að prófunin hafi mistekist: síðan segir af hverju og gefur kóða ástæðunnar. tenant þýðir að slóð lýsigagnanna er frá öðrum Entra-leigjanda (tenant) en aðgangurinn sem skráði sig inn.
  • Fólk úr notendastýringu bætist aldrei í teymið: athugaðu hvort externalId sé varpað á objectId.
  • Læst úti meðan SSO er krafist: eigandinn og stjórnendurnir sem þú nefndir skrá sig inn með rafrænum skilríkjum á venjulegu innskráningarsíðunni og geta hætt að krefjast SSO.
Svaraði þetta spurningunni þinni? Takk fyrir ábendinguna Ekki tókst að senda ábendinguna. Reyndu aftur síðar.